Diamars 4 di mei 2010 nos a conmemora cu 65 aña pasa a yega un fin na e cueldadnan di Segunda Guera Mundial. Masha hopi hende a sacrifica y a perde na bida pa awe nos por biba den libertad. Esaki tabata e mensahe cu por a wordo scucha na Hulanda y aki na Aruba diamars cu a pasa. Na Aruba tabatin un bunita ceremonia y hopi bon concuri dilanti e monumento di guera, na unda soldanan di Savaneta Kamp a forma un guardia ceremonial. Gouverneur di Aruba sr.F.Refunjol, Presidente di Parlamento Andy Lee, Prome Minister Mike Eman, ministernan Dowers y Oduber, miembronan di Parlamento y griffier, representante di Hulanda, miembronan di Mariniers Kazerne, alto funcionario di Polis, veteranonan y otro invitado tabata presente na e conmemoracion formal aki.

Prome Minister di Aruba mr.Mike Eman a hiba un discurso conmovedor na e ocasion special aki. P’e ta hopi importante pa nos para keto riba un dia manera esun di 4 di mei. No solamente pa honra esnan cu a muri, pero tambe pa siña un les di pasado. El a conta con tres aña pasa riba un 4 di mei e tabata para na Waaldorpsvlakte, un lugar den becindario di Den Haag. Na e sitio ey e Arubiano Boy Ecury a wordo tira mata. Para eynan hopi pensamento a pasa den su cabes. Kico por a pone un Arubiano hoben di un isla encantador manera Aruba cu un futuro prometedor tuma e deciscion pa forma parti di e resistencia na Hulanda. E tabata conoce e riesgonan y asina mes a pone su bida na peliger, sabiendo cu dor di su apariencia diferente na di su compañeronan, e ta core mas riesgo cu nan.

Tog el a tuma e decision y a paga esaki cu e prijs mas halto cu tin, cu su bida. Para na e sitio frieu ey na unda nan Boy Ecury a wordo mata, tur loke el a siña na scol en cuanto di e guera y resistencia a haya un otro dimension. Na unda Boy a muri, sanger a wordo derama, pa awe nos por biba den libertad cu ta parce di ta algo masha comun. Prome Minister ta sigui su discurso bisando cu nos a bin hunto pa conmemora esnan cu a perde nan bida den gueranan y nos ta para keto na e horor, na e dolor y violencia cu a wordo comete contra hendenan inocente. Nos ta pensa na e opresion, na persecusion a consecuencia di e mal uso di poder, di e mal uso di inteligencia y e mal uso di habilidadnan.

Nos mester para keto un rato y reflexiona pa evita loke a pasa. Tambe ta un dia pa ta agradecido, agradecido cu tabatin hende cu a lanta para pa usa nan forsa pa haci un fin na opresion y persecucion. Poder y forsa mester wordo usa pa sirbi. Mescos tambe nos mester ta contento cu Aruba por a yuda ora tabatin hende den hopi necesidad despues di e temblor na Haiti. A haci bon uso di nos forsa. Eman ta bisa di a sinti su mes orguyoso cu ora el a yega Haiti y a yega na un campamento bon organisa y a mira e bandera di Aruba ta bula y banda di dje esun di Hulanda. El a haya un sentimento di satisfaccion y speransa. Dos pais, banda di otro, como parti di Reino, trahando hunto cu tur nan poder y forsa pa yuda esnan den necesidad. Eman ta spera cu e dos banderanan aki ta simbolisa loke ta bai pasa den futuro.

Dos pais, cada un cu nan propio color, nan propio cultura y nan propio identidad, trahando hunto pa ta un lus den mundo.Yudando pa ta un lus pa otro. Nos ta trahando duro pa mustra cu na Aruba ta biba un pueblo fuerte, bon desaroya, bon entrena, potente y poderoso….pero guia pa amor, compasion y bondad. Eman su deseo ta cu como partner den Reino nos por comparti e balornan aki y cumpli cu nan. El a finalisa su discurso bisando cu pa nos aki libertad ta algo comun, pero ainda tin guera na hopi parti di mundo y tin Arubiano bringando den paisnan leu manera Afghanistan pa e libertad di otro. E ta desea tur cu den nomber di Reino Hulandes ta bringando den pais leu hopi forsa y un bon regreso pa cas.

Nos a logra drenta den e edificio pa por wak pa nos mes e deterioro di e edificio bandona aki. E edificio aki tin hopi historia su tras. E ta caminda e prome Prome Minister di Pais Aruba a cuminsa traha, sigui pa tur Prome Minister, te ora cu Sr. Nelson Oduber a dicidi di sali for di e edificio y lage bandona pa basta tempo caba.

Ta bon pa nota tambe cu den e edificio aki, Sr. G.F. Betico Croes, cu tin biaha ta jena boca di Sr. Nelson Oduber, tambe tin basta historia den e edificio aki. E edificio aki y Status Aparte tin hopi en comun. E dicon di e insistencia di laga e edificio histórico aki cay, ta keda un misterio pa un y tur na Aruba.

Ta di aprecia cu Sr. Mike Eman kier simbólicamente pone un énfasis ariba restaura nos edificionan histórico. No únicamente e historia di e edificionan ta importante, pero tambe nan valor cultural y Arkitectonico. Di nos banda nos ta spera cu den futuro Aruba por conta atrobe cu edificionan restaura, manera esun di Censo cu ta un orguyo cultural y histórico di nos pueblo.

Motibonan pa e victoria grandi aki ta varia di persona pa persona, pero loke tur hende ta keda menciona  en comun ta e “team”. E team cu hopi hende ta referi na dje como e “Dream-Team” ta loke a trece e vitoria segun hopi observador. Hopi tambe ta referi na e plan, cu ta un documento cu a sobresali grandemente ariba di otro partidonan politico. Pero no tin duda cu e lider cu a forma e team y a formula un maneho pa por jega na e plan, ta merece hopi credito: Mike Eman. Cu un total di mas di 8000 votos, cu hopi ta referi na dje  como “E Lider Stima di Aruba” ta bira e votegetter pa di dos biaha consecutivo. Faltando e resultadonan di e ultimo urna electoral, Mike Eman a hiba un discurso bunita, yena cu inspiracion y speranza dilanti di Cas di Partido Playa. Un multitud grandi di sostenedornan di e partido a aglomera dilanti di e centro di e partido politico, pa saluda y scucha e lider di Partido di Pueblo Arubano, y awo alaves e Prome Ministro electo, su palabranan.

For di paisnan bisinja un cantidad di politico y lidernan di e region a jama Mike Eman pa salude. For di reunionan di G20 na Merca, Prome Minister di Hulanda, a tuma tempo special pa jama Mike Eman y felicite cu e  logro grandi y bunita pa Pais Aruba. Prome Minister, Emily den Jongh El-Hage, Secretario di Estado Hulandes, Ank Bijleveld, Minister di Salubridad Ab Klink, Ministernan di Antiyas Martis y Zus de Lanooy y Presidente di Staten di Antiyas ta entre otro e politico y lidernan den Reino cu a jama pa felicita e Prome Minister electo di Aruba, Mike Eman. For di mas leu un cantidad grandi di lidernan afilia na ODCA y IDC a jama felicita Mike Eman, cu den e organisacionan aki tin.

Segun informacionan cu nos ta dispone di dje, cu Dialuna lo ta un dia importante y intresante pa desaroyonan politico. Entre otro e Prome Minister Electo lo bishita gobernador pa delinja e pasonan di e siguiente dianan.

Un felicitacion ta bay na henter partido AVP cu e resultado cla y raspa aki y specialmente na Mike Eman cu tin e vision, perseverancia y perspectiva pa por trece e cambio cu pueblo ta anhela pa e ultimo anjanan cu awor ta nos tras aki na Aruba.

Introduccion di BBO a resulta den consecuencianan negativo pa nos pais. Aruba a conoce un inflación nunca bisto den historia di nos país. Ora cu MEP a impone BBO, pueblo a sufri. Nos jiunan a bira victimanan inocente di BBO. Banda di scolnan decaí, ainda mester a acepta cu materialnan di scol a bira mas caro. Productonan di prome necesidad a bira caro pa esnan cu tin recurso, pero prácticamente impagabel pa esnan di menos recurso. Adicional na e crisis mundial e efectonan di BBO a haci di un problema económico controlabel pa un “perfect storm”: un crisis económico incontrolabel.

BBO Y SU EFECTONAN

Banda di e efectonan interno, ariba pueblo di Aruba directamente, BBO ainda ta causa di mas problema pa mama y tatanan cu ta traha na e refinería di Aruba: Valero. Mirando cu Aruba ta e único país na mundo cu ta cobra BBO na companianan cu ta exporta, Valero di su banda e expresa su preocupacionan di lo no por competi ariba mercado mundial si MEP introduci un BBO ariba exportación. Valero mirando cu MEP no ta intresa den dialoga, a haci un oferta pa asina haci posibel cu e compania por keda viabel pa por competi ariba mercado mundial.

Valero a propone pa kita tur Tax-holiday cu nan por tin y ariba dje a ofrece e garantia cu país Aruba por haya un winstbelasting di minimalmente Alfs. 50.000.000,00 tur aña, cu Valero hasi ganashi of no. Tur esaki pa por kita e BBO cu ta haci nan incompetitivo den mercado internacional. Adicional na tur esaki, Valero a propone cu lo inverti den e refinería sumanan di biyones di florin den un periodo relativamente cortico.

Partido AVP a mustra for di cuminsamento cu e practica di hisa of impone belasting ta dañino pa nos economia. E consecuencianan ta pueblo ta sintinan. Economicamente e imponemento di impuestonan ta causa cu comercio por haya presionan insoportabel pa e negoshinan. Valero ta un ehempel ariba mesa cu ta mustra e hecho aki. E sed pa placa di gobierno di Nel Oduber a causa cu awe Valero ta haye obliga di para su operacionan. Awe ta asina leu cu tur contratista lo perde nan trabou. E consecuencia ta cu e contratistanan aki lo no por tene nan trahadornan mas na trabou. Mama y tatanan di famia awor tin busca otro manera pa mantene nan famia. Den e situación instabil cu tin na Aruba e oportunindadnan no ta mustra alentador.

PRESUPUESTONAN ALTERNATIVO

Den Presupuesto Alternativo di 2008 y 2009, partido AVP a tene cuenta cu e situación cu nan a premira for di aña 2006. E proposición di Valero lo por a duna país Aruba un entrada cu lo a percura pa cualke deficiencia den presupuesto di Aruba. Sanea e aparato gubernamental y incentiva e economía enbes di restringi comercio ta maneranan cu a propone den presupuesto alternativo pa baha gasto y revitalisa Aruba su economía.

MEP di otro banda e scohe pa sigui cu gastamento, sigui sostene un aparato ineficiente y restringi comercio dor di haci prijsnan di productonan mas caro. Den e proceso aki Partido MEP a causa un crisis económico ariba cada mesa di casnan na Aruba.

CAMBIO MESTER BIN

Cambio mester bin, pasobra pueblo di Aruba no por mas. Cu Valero awe ta lagando centenares di mama y tata bay no ta culpa di e situación internacional, si no culpa cu MEP no a acepta e presupuesto alternativo cu AVP a presenta for aña 2007 caba. E consecuencia no tabata pa MEP. E consecuencia awe ta pa e pueblo cu a sinti e dolor di e introducción di BBO y awo esnan cu lo perde trabou lo sinti’e. Tin di pensa mas leu ainda: e efectonan di e cantidad di hendenan cu lo perde trabou directamente ta ocaciona cu otronan lo perde trabou tambe indirectamente.

E trabou di trahadornan cu ta traha den Valero mes (no-contratista) tambe ta na peliger pa motibo di BBO: pa motibo cu e idea cu ta e base pa e Presupuestonan Alternativo di AVP, MEP no kier a acepta. Aruba no por sigui den e inseguridad aki. Aruba mester un cambio. Partido AVP a mustra cu e.o. nan presupuestonan alternativo cu e partido tin e conocemento, e plan y e team pa por hiba Aruba den e rumbo cu e tin mester.

For di bishitanan na cas di nos grandinan cada biaha por mira y sinti e aprecio grandi cu nos grandinan tin pa Mike Eman. E hecho cu e ta un líder cu ta comprende e dolor di esnan mas grandi ta evidente. Por mira esey ariba cara di nos grandinan y e forma cu nan a convivi cu ne. Den su bishitanan di fin di aña, dia di mama y tata, Mike Eman no ta lubida un gesto pa nos grandinan. Loke ta resalta for di boca di nos grandinan ta cu e no ta bishitanan te na ora di campaña. Aña den aña afo e líder amigo tin nan den su mente. Ariba dia di su aña, Mike Eman a bay bishita y comparti cu nos grandinan. E motibo cu e la scohe pa comparti e dia cu nos grandinan ta cu e ta sinti cu e dia mester wordo comparti cu mama y tata nan di nos país. E no tin su mama y tata mas pa comparti su dia. E bashi di e ausencia di su majornan keri ta wordo jena cu e aprecio y sosten di mama y tatanan di nos país.

Cantando y bailando cu nos grandinan Mike a wordo brasa pa un señora di 81 aña di edad cu e palabranan: “Mi yiu Mike”. Pascualita a pidi Dios pa duna Mike hopi aña di “salud, bida, inteligencia y pasenshi” pa e traha pa e pueblo di Aruba.

Pascualita Faro na cierto momento a pone man na frenta di Mike a bis’e: “Nos yui Mike. Nos tin’e nos dilanti para. Cu mi tin gana primi’e duro duro y dune bida y salud pa su famia. Tur loke e tin, e tin hopi, Dios dune hopi visión, cu Spiritu Santo baha riba dje cu su misericordia, cu su talento y sabiduria, cu su famianana, pa e lucha grandi cu e tin awor su dilanti. Y cu dia 25 e ta e vencedor, e ganador di victoria dia 25. Papa Dios, danki, Gloria na Bo Señor pa mi yui Mike y su sostenedornan. Señor basha bo bendicion riba e yui aki y dune bida y salud, pasenshi pa su famia tambe.”

Palabranan sumamente bon escogi cu a worde aprecia pa tur esnan presente y specialmente pa e lider amigo kende cierto momento casi no por a domina su sentimentonan.

Un di nos grandinan tambe a mustra Mike ariba e hecho cu e partido berde semper a corda ariba nan. “E redoblacion di pensioen”, e grandi tas plica, “ta loke hopi di nos tabata tin mester di dje. Bo por imaginabo si nos a keda cu loke nos tabata haya?”

Mike Eman semper a comprende cu ta e sudor y sanger di mama y tatanan di nos país tabata loke a construi nos país cu ne. E aprecio di un pueblo pa su grandinan ta importante, pasobra no mester lubida y halanan un banda ora cu nan ta den nan añanan di sosiego. No mester lubida cu nan tambe tin derecho ariba un existencia drechi y digno di nan aporte importante pa nos país.

Manera Mike Eman mes a splica: “e aprecio pa nos grandinan no ta simplemente pa nan edad, pero pa e amor, respet y cariño cu nan a demostra pa y siña nos pueblo, país y nan prohimonan.”

Lider di AVP mr. Mike Eman durante di e conferencia di prensa dilanti di Bestuurskantoor a presenta e plannan pa e edificio aki y aerea cu ta rondone. E plannan aki ta demonstra claramente e diferencia entre liderazgo di e dos partidonan mas grandi di Aruba. E liderazgo ta refleha den e grupo cu ta rondona e lider y e manera con nan ta funciona. Por ehempel: nos gobierno actual tin e costumber di tuma decisionnan ad hoc y mayoria biaha ta resulta cu e decisionnan mester worde hala aden of ta tuma otro decision cu ta remplaza decisionnan anterior. E palabra “goberna” ta bin for di e lengua griego antiguo y ta nifica: mira padilanti. Asina ta cu un gobernante mester tin un vision pa furturo. E mester por visualiza con su pais lo ta aki 20, 30 of 50 aña. Basa ariba e vision aki e ta tuma decision y crea proyectonan. Na momento cu un gobernante no tin vision e pais no ta worde goberna sino simplemente e pais ta worde maneha. Esaki ta un malgastamento di tempo, placa y energia pasobra no por tin un desaroyo integral. Awendia hasta companianan tin nan plannan pa proximo 10 of 20 aña pa nan por tin un desaroyo optimal y por competi den un mercado cada biaha mas competitivo.

Durante ultimo 8 aña nos pais a worde maneha y esaki ta bai cambia despues di dia 25 di September. Ariba e fecha historico aki pueblo di Aruba lo eligi un lider nobo cu tin un vision cla pa futuro. Un homber cu ta mira claramente cu pa Aruba progresa tur hende mester progresa. Un lider cu tin sentimento sosial y ta comprende cu e pueblo mester tin placa pa paga su cuentanan di awa y electricidad. Tatanan di famia mester por pone pan ariba mesa y famianan humilde por tin soñonan grandi pa nan yiunan. Tin hobennan talentoso y inteligente cu tambe merece di tin un computer, pero e mayornan no por cumpra esaki. E programa di computer pa muchanan di scol lo bin bek pasobra aki nos tin un lider cu ta mira cu muchanan naci den famianan di menos recurso tin un desventaha ariba otronan. Mike Eman ta un berdadero lider di pueblo y no kier mira nos grandinan pasa trabao pa sobrevivi pasobra e placa di pension no ya no ta alcansa. E problematica di choller tin su atencion y ta halto ariba su lista di prioridadnan pa e partido lidera pa Mike Eman. Na lugar di sigui ariba un caminda sin resultado Mike Eman ta mira cu ta mihor acepta centronan di rehabilitacion den exterior pa duna nos un man. Cu Mike Eman na timon, e barco Aruba lo nabega pa un destino sigur na beneficio di un y tur. Esey por worde bisa solamente ora cu tin un lider cu tin un vision pa futuro.

E no por kere cu simplemente e ta nenga di haci loke ta rekeri di politiconan den paisnan democratico rond di mundo. Pueblo tin e derecho y Nel tin e obligacion di publicamente debati cu su oponente politico. Ta pesey ta necesario pa henter nos comunidad mustra Nel Oduber ariba e obligacion di participa den un debate. Si berdad Nel keda nenga di mustra pueblo su cara y defende loke e a haci cu nos pueblo durante e añanan cu a pasa y anuncia na nos pueblo kico e tin planea di haci e proximo cuatro añanan e mester worde castiga seriamente den e proximo eleccion.

Pueblo no por accepta cu durante añanan e medidanan di mas pisa a worde introduci door di Nel y awe e no kier bin duna cuenta di esaki. No por ta asina cu e a cera e refineria di Aruba, core cu KLM y Carnival Cruises y e no ta bin dilanti su pueblo pa splica pakico e a causa e drama di nos pais. E no por worde permiti di cobardia pa e debate y tur hende mester haci e maximo esfuerzo pa e dabate aki tuma luga.

Sr. Dowers a laga sa cu a tuma ministro Wever 8 aña pa un proyecto di dump y awor nos ta mira un costruccion andando, pero ta dificil pa kere cu aki lo tin un clinica di cardilogia a corto plazo. Ora cu nos mira cu ni na hospital mes e no por a garantiza un servicio di cuido medico optimal anto con e lo por garantiza esaki na centro Medico San Nicolas. Sr. Dowers a bisa cu si aki ta trata di un proyecto pa brinda e servicio di cuido medico basico di alto nivel cu ta sostenible a largo plazo anto A.V.P. lo bisa cu e ta un bon proyecto.

Awor cu Ministro Wever a pretende di habri un hospital di cardiologia pa luna di September nos por bisa cu e momento a yega pa e ministro tuma su retiro. Sr. Dowers a pidi pueblo pa keda conciente y spierta pasobra esaki ta un otro smoke screen den tempo di campaña pa crea ilusion y despues di eleccion nos ta bai tende tur sorto di excusa. Si ministro Wever no por a garantiza un cuido medico optimal pabao di brug, con e ta pretende di por habri un hospital na San Nicolas na luna di September. Asina ta cu e momento a yega pa ministro Booshi Wever tuma su retiro manera cu e a bisa. Be a man not a mouse!

Diaranson ultimo miembro nan di e brigada hubenil di Mike Eman a hasi entrega di algun material necesario na Cas di Anciano na Tanki Leendert, Betesda Home Care. E brigada hubenil a opta di subi caminda na varios actividad di partido pa asina recauda fondo pa por juda e instituto aki cu lampi di bateria. E iniciativa aki a wordo tuma despues cu a wordo treci dilanti cu durante e ultimo blackout nacional, e cas di anciano tabata completamente scur y verzorgsternan tabata tin un tarea basta pisa pa por a alivia e grandi den momentonan inicial di panico.

Riba e atardi aki, e hoben nan mes a bora, schroef y instala e lusnan practico aki, cual nan ta spera cu si acaso e situacion surgi atrobe cu no tin luz (por ehempel den temporada di horcan, e Cas di Anciano por ta un poco mas alivia. Esaki no ta e prome biaha cu a duna man na Cas di Anciano Betesda. Por corda cu algun luna atras e brigada hubenil di Mike Eman a logra recauda un suma substancial pa por financia 2 matras semi-ortopedico. Kristiene Moreta kende den presencia di algun miembro di e brigada hubenil a hasi entrega di e donacion aki a bisa cu e ta wak den futuro mas donacion na instancianan manera Betesda. Instancianan cu awe ta cuidando nos grandinan cu ya caba a aporta grandemente na nos comunidad. “Ayera e tabata dos matras, awe lampi nan di bateria y den futuro lo ta ideal pa por financia por ehempel un molina di biento pa asina full e centro pa nos grandinan por keda den airco. Ta wak hopi oportunidad den e futuro pa por duna un man na e tipo di instancianan aki cu tin mester di ayudo, material y atencion.”

E hobenan di brigada ta sigi pa gradici Mike Eman y partido AVP pa duna nan e espacio pa por desaroya nan mes riba un tereno cu no ta tur dia nan ta haya nan mes enfrenta cune y alavez e oportunidad pa por desaroya diferente projecto pa duna bek na e comunidad.

Pa tur problema tin solucion! Loke tin mester ta e boluntad pa yega ey dor di pone awa den biña. Mester por negocia y usa bo poder pa haci areglonan di manera cu bo partnernan strategico tin un sosten cu ta pone nan sinti comodo. Nan kier sinti cu nan por conta cu gobierno, cu nan tin un partner cu cual nan por soluciona problema y enfrenta cualkier reto den futuro. Nan ta nos partnernan strategico y nan ta spera di tin atencion di gobierno ora problemanan presenta. Nan ta e motor cu ta draai nos economia. Nan ta crea trabao pa tatanan di famia y como tal nan ta indespensable. Ta dificil pa un gobernante comprende esey?

Ora cu nos mira loke a pasa cu KLM, Carnival Cruises, American Airlines y Valero nos por conclui cu den cada caso gobierno tawata e factor negativo. Den cada caso e falta di boluntad pa yega na un solucion di parti di Gobierno a tranka un desaroyo positivo. Cada biaha cu tawata tin un luz na horizonte, Gobierno na un manera abrubto a paga esaki simplemente pasobra e boluntad pa yega na un solucion no tawata tey. Gobernacion no ta facil pero si bo tin e bienestar general na prome lugar, e ta yuda soluciona hopi problema. Si bo ta miembro di Sosialistanan Internacional y bo tin un “issue” cu multinationalnan, corda cu bo reponsabilidad primeramente ta cu bo pais. Corda cu tin tatanan di famia ta traha cu e multinationalnan. Nan mester pone pan ariba mesa tur dia y muchanan mester tin paña pa nan bai scol. Nan no tin nada di haci cu bo sosialismo eroneo pasobra nan ta mira cu nan propio wowonan con bo ta privilegia bo grupo di Friends & family. Esey ta cosnan cu lider di MEP mester siña comprende. Ora bo ta ministro ta pueblo di Aruba ta paga bo salario y ta pa e pueblo di Aruba bo mester traha. Bo’n tin nada di haci cu socialistanan internacional pasobra nan no ta duna ningun hende di come ni bebe. No bringa bo guera cu multinational ariba lomba di e pueblo di Aruba. Abo no ta perde bo trabao y bo tin un pension fabuloso. Tur esey ta worde paga door di e pueblo di Aruba su placa di belasting. Di tur manera cada problema tin su solucion y e problema di mal gobernacion ta yegando su solucion dia 25 di September proximo ora cu votadornan ta core cu MEP foi gobierno.