NEL ODUBER NO POR COBARDIA PA E DEBATE

Debate entre Mike Eman y Nel Oduber mester tuma luga. E cos di mas normal den un pais democratico ta cu e oponentenan politico ta hiba debatenan publico pa e pueblo por huzga e plannan di esnan cu mester worde elihi. E fenomeno di debate no ta na discucion mes. Loke por worde discuti prome cu un debate ta e condicionnan di e debate y no tin duda cu na Aruba awe bao di e circumstancianan actual e pueblo tin e derecho di scucha e plannan di e dos lidernan di e partidonan grandi. Ta imposibel pa Nel Oduber dicidi cu e no ta respeta nos pueblo y nenga un debate cu Mike. E tin di defende su maneho di 8 aña largo y mester bin splica pueblo kico su plannan ta pa futuro. Cu Nel Oduber tin miedo di enfrenta su oponentenan ariba tereno publico: abiertamente pa un y tur por ta testigo.

E no por kere cu simplemente e ta nenga di haci loke ta rekeri di politiconan den paisnan democratico rond di mundo. Pueblo tin e derecho y Nel tin e obligacion di publicamente debati cu su oponente politico. Ta pesey ta necesario pa henter nos comunidad mustra Nel Oduber ariba e obligacion di participa den un debate. Si berdad Nel keda nenga di mustra pueblo su cara y defende loke e a haci cu nos pueblo durante e añanan cu a pasa y anuncia na nos pueblo kico e tin planea di haci e proximo cuatro añanan e mester worde castiga seriamente den e proximo eleccion.

Pueblo no por accepta cu durante añanan e medidanan di mas pisa a worde introduci door di Nel y awe e no kier bin duna cuenta di esaki. No por ta asina cu e a cera e refineria di Aruba, core cu KLM y Carnival Cruises y e no ta bin dilanti su pueblo pa splica pakico e a causa e drama di nos pais. E no por worde permiti di cobardia pa e debate y tur hende mester haci e maximo esfuerzo pa e dabate aki tuma luga.