AVP TA E GARANTIA PA NOS AUTONOMIA

Un di topicononan cu MEP kier usa pa desvia atencion di votadornan foi e malgobernacion, corupcion y efectonan desastroso di BBO ta nos autonomia.

Atrobe nos ta mira con dirigentenan di MEP ta balota inteligencia di nos pueblo pasobra e pueblo aki ta conciente cu AVP a nace for di e lucha pa soberania. Aceptacion di e mocion di derecho di  soberania di e Pueblo di Aruba dia 18 di Maart 1948 ta e fundeshi ariba cual Status Aparte a worde construi. Ademas AVP ta e partido cu a logra e acuerdo cu e otro islanan pa Aruba por sali for di e constelacion Antiyano loke ta e condicion  primario cu Hulanda a pone pa por papia ariba Status Aparte pa Aruba. E Frente Nacional pa logra e Status Aparte ta otro iniciativa cu a nace for di AVP y aunke tin hende den MEP cu no ta corda esaki of cu e tempo ey tawata mucha cu ainda ta bai school. Pero nos no tin mester di bai bek tanto tempo den historia pa nos sa unda nos derechonan ta mihor protehi. Ora nos mira kico actualmente ta pasando den nos relacionnan cu madre patria nos ta puntra nos mes ta kiko e dirigentenan di MEP tin den nan cabez. Constantemente nan ta busca confrontacion cu gobierno di reino ariba topiconan relativamente insignificante. Por ehempel nan kier pa e Corte Comun di Husticia “roteer” su oficina entre Aruba y Corsow. Nan insistencia pa e tipo di cosnan aki no ta duna nos jiunan scolnan adecua pa haya les aden. Awe nos jiunan ta sinta den trailernan cu ta surpasa 35 grado celcius hayando les. Condicionan increíblemente malo pa enseñanza. Scolnan uno tras di otro ta wordo declara inadecua pa duna les. BBO a cuasa un desaster económico-financiero pa nos pueblo. Infrastructura di Aruba tana nivelnan nunca bisto den nos historia como país.

Nan kier haci y deshaci den gobernacion di nos pais, mientras cu nan sa cu Statuut ta duna e  gobierno di Hulanda “hoger toezicht” y e derecho pa intreveni den casonan di malgobernacion y corupcion. Nan a causa un desastre tras di otro den gobernacion y a pasa miyones di florin ariba cuenta bancario di nan famiyanan. Awor cu Gobierno Hulandes a dicidi di haci un investigacion completo di tur loke nan a haci malo, nan kier zapatia ya haci manera cu gobierno Hulandes no ta respeta nos autonomia. E peliger mas grandi pa nos autonomia ta e partido MEP pasobra nan maniobranan straño ta bai pusha nos for di Reino y den un aventura di independencia cu no ta brinda nos e stabilidad politico cu ta e principal ingrediente pa cualkier tipo di inversion. Desesperacion ta pone e lidernan di MEP haci saltonan straño. Den agonia di nan morto politico nan ta zapatea y grita cosnan manera autonomia di Aruba. Pero no ta esey ta molestia nan! Loke ta molestia nan ta cu nan ta comprende masha bon cu hamas y nunca nan por gana un eleccion despues di a abusa di e pueblo aki durante di 8 aña. Pesey tin democracia y dia 25 di Sepember Pueblo di Aruba lo haci bon uso di su derecho di voto pasobra AVP ta e mihor garantia no solamente pa nos autonomia sino tambe pa nos economia.