Según Partido AVP ARUBA TIN UN GOBIERNO INCAPAZ

Aruba ta den problema atrobe! Refineria ta serando y miles di tata di famia ta perdiendo nan trabao. Nos tawata tei caba! Ta e mesun cos a pasa prome cu nos a haya nos Status Aparte den Reino Hulandes. Pa colmo ta e mesun hendenan tawata den gobierno y ta mesun eror a worde cometi. Ki bal si bo tin mas cu trinta aña den politica y bo no a siña nada. Ni di bo propio erornan bo no kier siña loke ta un terkedad cronico. Un malesa incurable y e unico solucion ta pa retira foi politica. Pero e mesun terkedad a haci cu e lider di MEP tei keto bai y no a keda e pueblo di Aruba nada otro cu core cu ne foi gobierno.

Pa tur problema tin solucion! Loke tin mester ta e boluntad pa yega ey dor di pone awa den biña. Mester por negocia y usa bo poder pa haci areglonan di manera cu bo partnernan strategico tin un sosten cu ta pone nan sinti comodo. Nan kier sinti cu nan por conta cu gobierno, cu nan tin un partner cu cual nan por soluciona problema y enfrenta cualkier reto den futuro. Nan ta nos partnernan strategico y nan ta spera di tin atencion di gobierno ora problemanan presenta. Nan ta e motor cu ta draai nos economia. Nan ta crea trabao pa tatanan di famia y como tal nan ta indespensable. Ta dificil pa un gobernante comprende esey?

Ora cu nos mira loke a pasa cu KLM, Carnival Cruises, American Airlines y Valero nos por conclui cu den cada caso gobierno tawata e factor negativo. Den cada caso e falta di boluntad pa yega na un solucion di parti di Gobierno a tranka un desaroyo positivo. Cada biaha cu tawata tin un luz na horizonte, Gobierno na un manera abrubto a paga esaki simplemente pasobra e boluntad pa yega na un solucion no tawata tey. Gobernacion no ta facil pero si bo tin e bienestar general na prome lugar, e ta yuda soluciona hopi problema. Si bo ta miembro di Sosialistanan Internacional y bo tin un “issue” cu multinationalnan, corda cu bo reponsabilidad primeramente ta cu bo pais. Corda cu tin tatanan di famia ta traha cu e multinationalnan. Nan mester pone pan ariba mesa tur dia y muchanan mester tin paña pa nan bai scol. Nan no tin nada di haci cu bo sosialismo eroneo pasobra nan ta mira cu nan propio wowonan con bo ta privilegia bo grupo di Friends & family. Esey ta cosnan cu lider di MEP mester siña comprende. Ora bo ta ministro ta pueblo di Aruba ta paga bo salario y ta pa e pueblo di Aruba bo mester traha. Bo’n tin nada di haci cu socialistanan internacional pasobra nan no ta duna ningun hende di come ni bebe. No bringa bo guera cu multinational ariba lomba di e pueblo di Aruba. Abo no ta perde bo trabao y bo tin un pension fabuloso. Tur esey ta worde paga door di e pueblo di Aruba su placa di belasting. Di tur manera cada problema tin su solucion y e problema di mal gobernacion ta yegando su solucion dia 25 di September proximo ora cu votadornan ta core cu MEP foi gobierno.